RC-Flieger Club Bayreuth e.V. - Vereinsausflug 1981

RC-Flieger Club Bayreuth e.V.

Start Galerie Fluggelände Historie Termine Links

	Vereinsausflug 1981

	Die meistn wolltn ja kumma mitn Bus, a poor mitn Auto, a poor a zu Fuß, doch noch der Zohl, des is fei gwieß gibts schon nuch Leit mit groda Fieß. Am Start senn do die Schmidt und Meier, do werds bestimmt a lustig heier. Und korz noch neina, auf alla Fäll worn a die letztn dann zur Stell. Und als schließlich der Startschuß fällt, siechst, daß vom Stamm fast kaner fehlt. Dann laaf mer los ab Meyemberg, ercht weng ebn no, dann nauf na Berg und sowos gibt dann a gleich Dorscht und weit is nuch zum Wärtshaus Forscht. Den erschtn hängt scho raus die Zunga, net bloß den Altn, a den Junga. Doch vorna dron mit festem Schritt, der Vorstond, er ziecht alla mit. Startschwierigkeiten, konn ma hörn, die möng die Flieger gor net gem. Drum Blick nach vorn, die Ohrn ongstellt, so zieng mir weiter in die Welt. Wer waß wos uns nuch tut erwarten im herbstlich schönen Gottesgarten. Denn früher wor des einfoch so im Bus wor stets a Kastn do und scho noch a poor hundert Meter sogt meistns aner von die Peter: "Geh, Meier, tu mol bal wos ron, mir picht ja gleich die Zunga on." heit mußtn alla wenger gluckem, es geht halt net viel nei in a Plastikguckern und scho beim Packen denkst ons laafen, denn du mußt alles selber schlaafen. Und siechst as Wärtshaus von weiten lieng donn gleich die Fieß viel schneller flieng und a des Gfühl tut dich betrüng als könnst as Bier bis doher rieng. A jeder schmunzelt, ma könnt mana der Himmel is a anziga Fata Morgana. So döst a macher vor sich hin und hockt im Geist scho gmietlich drin. Daß es danoch weng schneller geht, dafür sorgt scho der Bier-Magnet. Doch des is alles trügerisch, walls doch a halba Stund nuch is. Und hättst für Gedanken du a Ohr, so kummat unter anderm vor: Es denkat bei sich so der Meier: „As Bier is ieberoll zu teier, es müßt halt höchstns zwa, drei Groschen die Moß oder as Fäßla kosten." „Und von der Essensportion, tät ich nuch mol so viel verdrong!" könnt ma na Helmut drauf vernehma. Sei Fraa vielleicht, tu sich fei scheema. Es hängt ebn a jeder seina Gedanken noch und so werds ganz schnell a Mittog. Doch vohier wors a bißla dreckat nuch bei unserm Marsch durchs Teifelsluch.	Links left as Wasser, rechts tropft as Wasser und on die Fieß werds naß und nasser doch die wern so wie a die Socken beim Laafen ganz von selber trocken solltn sa weng dreckat sa, in vier, fünf Wochen bod mer ja. Und zwischendurch on mancher Stell, do is fast so finster wie in der Höll. Wenn zwischendurch a Zweigla knackt, mant mancher, daßn der Teifl packt und dann ham etliche scho gschaut, ham sich net durch des Luch getraut. Doch bei den meistn wor do bloß der Hintern und der Bauch zu groß, vielleicht hot mancher a dro glabt, daß ihn dabei der Teifl sabbt und mitn Gaßfuß gibt an Schlog, so daßn net amol mehr der Teifl mog. Doch do dron trägt allans die Schuld des Sprichwort, daß dich der Teifl hult. Doch noch den riesengroßen Strapazen konnten alla sich in der Woldhüttn laben. Den Sauerbroten und den vom Schwein dreht mancher scho mit Haßhunger nei. Vom Bier und a vom Schworzbeenwein do schöpfn mancha ganz schön ein. Und hinterm Haus macht ganz auf Schau die Gretl, a echta, alta, wilda Sau. Als alles gezohlt und jeder is sott, do gänga mir a vo dort wieder fort. Als a weng zäh der Haufn läft los, denk ich, hoffentlich schaffn sas bis Altenplos Doch bis do nieber, do is es net weit und a mancher sich scho aufs Ombdessn freit. Es is scho spät am Nochmittog do laaf mer zu auf Tannaboch; bei manchem is weng schwer der Tritt doch alla haltn tapfer mit. Und jeder siecht, einschließlich Meier, direkt vor uns den Hausberg Bleyer und dohinter liegt ganz stad des schöna Dörfla Hannerschrath und dann marschiert die ganza Raß ins Örtla nei durch die Wolfngaß. Und jetzt seid ihr do in dem schmucken Ort und wollt bestimmt a so schnell net fort, denn in der Küchn und im Keller, im Gloß und a in jedem Teller siecht ma, daß wärklich gornx fehlt, ma muß scho song, gut ham mir gwählt. Und jetzt ihr Madla und ihr Bumm schickt gleich amol des Krügla rum des Zeing vomdrauf, des gilt als Stempel zeigt on, des is a Flieger - Pembel. Bei der Größ braucht sich kaner schema an kräftign Zug do draus zu nehma. Und tot dabei kann Zwong eich on der Wärt hot fei nuch mehr davon. Jetzt loßts eich schmeckn, trinkt mit Freid, ein Prosit der Gemütlichkeit.




	Den Download des Gedichtes als PDF gibt es hier

Ohne_Titel_1