RC-Flieger Club Bayreuth e.V.

RC-Flieger Club Bayreuth e.V.

Start Galerie Fluggelände Historie Termine Links

	Bergfest 1983

	Wenn ich so ons Bergfest denk hots ja jedes Johr scho grengt. Freitog früh um halba neina tut nuch schee die Sunna scheina doch auf mittog zu ton folgen scho die erschtn dunkln Wolkn und wie solls dann andersch saa am Onfong rengst a bißla klaa und dann werd des immer mehr, daß d' manst, es spritzt die Feierwehr und zum Abschluß kummt a nuch so a klaner Wolknbruch, und dann standen rum die Wäng wall der Berg wor glatt vom Reng. Doch desmol wor des uns vergönnt, es hot sich vorher scho ausgrengt. A bißla konnt mer meckern nur vielleicht über die Temperatur. Es is ebn net so wie stets vor Johrn, wall die Flieger gestern Wallfohrn worn und sowos dann a Pluspunkt brängt, vielleicht hots desweng desmol net grengt, denn sowos siecht der Petrus a, der muß a Flieger gwesn sa. lch hob gedocht, des geht net gut, wall sich ja heier gor nix tut, und dann wor Pfingstn a weng spät, is klor, daß alles schnell dann geht, denn manchmol fällt a mir nix ein, a wenn ich mich ganz fest knie nei. Und a die Stors wern langsam ror, es senn ja bloß ner nuch a Poor, donn sich die Reiha weiter lichtn is ja bal Schluß a mitn Dichtn. Hätt ich net a poor on der Händ, so wär ich etzat scho am End, dann müßt ich song, es hot mich gfreit, doch leider is scho Schluß für heit. Ganz spät hob ich die Tips erscht kriegt und hob ganz eilig was zammnflickt und hobs desmol ganz stork im Gfühl, daß eich des reißt net von die Stühl. Drum is am besten und ich mach gleich reina Tisch und kumm zur Sach: Scheinbor is in die Vogesen, desmol nix besonders gwesen, denn der Schmidt hot ganz laut gsogt: „Alles Scheiße, gor ka Frog." Und nuch a Spruch vom Schmidtn-Peter: „Schod um die 1000 Kilometer." Doch ganz so org konn mers net song, denn es hot sich doch wos zugatrong. Mit am oltn Golf vorndro, hängt mer sich kann Wohnwong no, denn so a Fohrt mit an Haufn Rost a an Haufn Nervn kost. Doch ungeniert fährt unser Moo ab in Richtung Petit-Baloon. Als es beim Prokscha plötzlich stinkt, waß er net woher des kimmt, doch wie er sich wend' und dreht, ieberoll die Wolkn steht. Doch des ana waß er nuch, von ihm aus geht a anerer Geruch, und kummt der Gstonk do net von ihm, dann muß des wohl am Auto lieng, er rennt amol, zwamol außen rum irgendwo, do stinkt a Trumm, bis er endlich doch kummt drauf, mei Kupplung gibt ihrn Geist gleich auf. Er siecht scho kumma den Verdruß, daß er sein Wohnwong hamschiebn muß, und inna drinna Fraa und Kinner, die wern na schee zum Schwitzn bringa. Doch als die Kupplung wieder kühl und er fährt mit aweng mehr Gfühl, werd er bestärkt in seinem Glam, do kummst scho hie und wieder ham, denn a die andern tätn song: „Wos fährstn so an altn Wong." A anders Auto, anderer Moo, kummt in der Reihenfolge dro: Die Autogröß, na, so 5/8 und obn nuch drauf a Flugzeigschochtel, fünf Flieger do bequem neigänga, zur Not kennst a a Fraa neizwänga, so jedenfolls sogts unumwunden, der Jürgen ganzkorz ongabunden, wenn sich Brigitte net gut führt, werd sa einfoch umquartiert und die Flieger kumma runter, hintn nei zum andern Plunder. Denn do lieng vom Bier die Dosen neba aner Faschingsnosn, und die Motorsäg mit Öl derf bei kaner Fahrt ihm fehln, nebn dro liegt a nuch a Hackn und a runda Rolln zum Kacken, alles wos mer braucht im Lebn, hot der Jürgen im Citroën Doch manchesmol konns er net lossn sogor do drübn bei die Franzosen, daß er ebn wos na grodna gfällt, einfoch no sei Auto stellt, desmol hot ers ebn pfeilgrod abgstellt unterm Parkverbot. Als er kummt zum Wong zurück, werd der Jürgen ganz venückt, hinterm Scheibenwischerarm, klemmt a Zettel vom Gendarm. Plötzlich fällts na ein ganz stark, daß er ja hot falsch geparkt, und augenblicklich werd er kla: „Des kost mich ja an Haufn Franc. Horcht, wer fa eich wor amol schon beim Gandarm Schaprog in der RueChalon? Denn dort muß ich die Strof berappn, sunst donn sa on der Grenz mich schnappn." Doch der Schmidt kennt gleich die Schrift, eventuell a nuch den Stift, womit is der Zettl gschriebm. Drum is ihm a nix überbliebm	unserm Jürgen zu bekunden, daß des alles is erfunden. Do danoch werd a ganz schnell, sei roter Kopf gleich wieder hell. Wer reist, zum Teil a leiden konn, des zeigt der Vers vom nächsten Monn. Wall a poor Aufträg naus noch mußten, hot er daham ka Zeit zum Husten, drum fährt er ebn in die Vogesen, um von dem selben zu genesen, denn in der reinen Höhenluft, sich des doch gleich viel leichter hust! Daham erzeugt der schorfa Dampf so manchen storkn Hustenkrompf, und unterwegs, vom Streß jetzt frei, fällt ihm sein Husten wieder ei, von allem frei in der Natur, do is des bloß a Hüsteln nur. Denn gleich am Plotz die anern mußten fort lauschen, ob er nuch tut husten. Doch er wollts zeing der ganzen Welt, wie a großer Bernhardiner bellt. lm Umkreis von 200 Meter könna net schlofen die Leit dann später. Die Uhr steht fast auf Mittemocht als es beim Progscha plötzlich pocht, der maant ja gleich, ihn tritt a Pfer, wer do wohl nochts nuch draußn wär, die Stimm weng schwoch und a recht heiser, die konn bloß ghöm na Helmut Weiser. Er frogt ganz leis, ob er könnt krieng vom Kinnern ihra Medizin, dann läßt vielleicht der Husten noch und alla könna schlofn ohna Plog. Die Schlofgestörten finnas schee und zieng doraus des Resümee: As Lebn is schee, a rechte Lust, wenn mer net ständig husten muß, denn sowos gibt zum Aufregn Grund, wenn der Vorstond net is gsund, mittlerweile is ers doch, drum: unser Helmut lebe hochl Mol säng, wos jetzat im Programm, mir alles noch zu bieten ham. Wer ihm begegnt wär in der Nocht, der hätt an Bong um ihn rum gmacht, as Hoor weng wirr, der Bort hot gstrotzt grod wie beim Räuber Hotzenplotz doch schaut sei Gsicht mer näher on siecht mer, der konn kaner Flieng wos don, und werna nuch weng näher kennt, waß, daß er gibt sei bestes Hemd und daß er sich a ausziegt ganz, so is er ebn der Seyßn-Hans. Er wor der Moo mit Bort im Gsicht davon mer heit gor nix mehr sicht der Bort is ab, as Gsicht is glott mol säng wos er dort ongstellt hot. Als Hauptpreis solls am Ombd mol gebn zorta Steaks mit Knoblauch-Crem. Alla freia sich scho drauf schaua zu und passen auf , doch der Hans macht des ganz gschickt, hot na Meier seins nuch gspickt, und immer wieder tut herweha der Duft von jeder Knoblauch-Zeha. Des Steak schaut aus wie a Hosarückn, des tut na Gerd richtig entzücken. Beim Onblick denkt er welch Genuß, und gor net dro, wos folgen muß. Er tut ja bei normola Speisen scho hinterher ganz kräftig rülpsen, und als am Morgen er muß sausen denkt er, er is in Knoblauchshausen. On sich an Gruch fast wie a Wilder, daß d'zan Schnaufen brauchst an Filter. Wär der Umweltschutz aufkracht, die häftn na Meier glott verhaft, denn ans ist etzat bombenfest, er hot die ganza Luft verpest, und von dem penetranten Gstonk wern sogor Franzosen kronk, denn alla Leit in die Vogesen, song sowos wär nuch net dogwesn und alla mit Bareither Nummer die braung net mehr noch Frankreich kumma, denn sogst du bloß, daß d' Bareith kennst loßn sa dich scho gor net über die Grenz. Und nuch amol senn sa drübn gfalln auf, als aner läßt sein Flieger nauf. As ganz Modell, wie ich berichte, is gute, echte, deutsche Fichte, die Farb is scho a bißla fahl, vielleich wor gelb sie früher mol. A poor hörst hintnrum gleich song: „Den hot halt scho sei Opa gflong, des Flugzeig hot er sicher geerbt, des weng is des so org verfärbt, und er hot, daß kans drieber lacht sich Sunna-Reflektorn nogmacht, net außn dro, wo sunst die Ohrn, senn seina silbem Reflektorn, denn wenn er fliegt in großer Höh, kennt ihm vielleicht der Strom augeh, die Sunna liefert dann die Kraft, daß er scho Kunstflug-Schnörkel schafft, doch irgendwann er runter muß, zur Landung meistens in an Busch. Seit er is in der Vorstondschaft sich öfter er zum Flieng aufrafft, denn früher hot er sei Modell bloß gatrong vom Hobbyraum bis naus zum Wong, dann hot er irgendwen getroffen und stott zum Flieng, ham sa an gsoffn, denn dort wo a vulls Fäßla steht, a stets na Gerd sei Weg nogeht. Doch senn mer froh, daß mer ihn ham, denn so wie mir senn, paß mer alla zam und uns allazam noch viel Spaß und Freid für heit obmd und für die fernere Zeit und zwawos konn ich uns wünschen nuch stets guten Wind und stets guten Flug.




	Den Download des Gedichtes als PDF gibt es hier

Ohne_Titel_1